Buscar
Buscar
El Conseyu de la Mocedá del Principáu d’Asturies entama una nueva edición de Xaréu. Folixa Moza, una xornada gratuita que va celebrase’l 20 de xunu nos Almacenes Kuivi d’Uviéu y que va xuntar música, talleres y xuegos tradicionales nuna folixa pensada pa la mocedá.
Dende’l Conseyu de la Mocedá del Principáu d’Asturies volvemos entamar Xaréu. Folixa Moza, un festival que forma parte de la programación cola que tamos celebrando los nuestros 40 años de trabayu a favor del asociacionismu y la participación xuvenil n’Asturies.
Tres la primer edición, celebrada l’añu pasáu en La Benéfica de Piloña, esti añu treslladamos la propuesta a los Almacenes Kuivi d’Uviéu con una xornada gratuita que va desenvolvese de 16.30 a 2.00 hores. La música n’asturianu y les propuestes más nueves venceyaes a los sones del país van volver ocupar un llugar central nuna cita que quier ser, al empar, espaciu d’alcuentru, celebración y participación moza.
La programación va entamar a les 16.30 hores coles tradiolimpiaes, una sesión de xuegos tradicionales pensada pa abrir la xornada d’una manera participativa y festiva. Darréu, de 18.00 a 19.00 hores, van celebrase dos talleres simultáneos: un taller de pandereta a cargu del Grupu Folclóricu Prau Llerón, de Mieres, y un taller de DJ impartíu por La Güeriata.
De 19.30 a 20.30 hores, Prau Llerón va volver participar con un taller de baille tradicional asturianu, una propuesta pensada pa siguir caleciendo l’ambiente enantes de l’entamu de les actuaciones musicales.
La música en vivo va arrancar a les 21.00 hores con Algaire, una formación que renueva y actualiza la música tradicional dende una mirada contemporánea. Darréu, de 22.30 a 23.30 hores, va ser el turnu de Ferla Megía y Llevólu’l Sumiciu, que van aportar una propuesta onde conviven electrónica, dembow, reggaeton y sonoridaes venceyaes a la música de raigañu.
La xornada va zarrase cola sesión de DJ de La Güeriata, de 00.00 a 1.30 hores, con una selección musical na que van convivir les propuestes más nueves de la música asturiana con otros estilos actuales y internacionales.
Con Xaréu. Folixa Moza queremos siguir xenerando espacios de participación, celebración y visibilización de la creación moza, dando protagonismu a la música, a la cultura popular y a les formes contemporánees d’espresión que tán surdiendo n’Asturies. Esta nueva edición forma parte del nuesu compromisu por siguir faciendo del CMPA un espaciu d’alcuentru útil, vivu y conectáu cola mocedá del país.
